انا عايش وسطكم
فاكره لما قلتلك يوم ماموت
لبسك اوعى يبقه اسود
وحزن قلبك غيريه ومتعيطيش
لاني عايش وسطكم ومتعرفيش
يومها قلتي الف بعد الشر عنك
ده كل الشر في البعد عنك
ده انت ساكن قلبنا وازاي نعيش
لو يوم قلبك ساب مكانه
هيقف بينا الزمان
ويروح مننا كل الامان
طيب مين يواسي حزننا في البعد عنك
ومين يطمنا في غيابك لو يوم قلقنا
ومين يحضن فينا وجعنا وحزننا لو يوم حزنا
ومين يطمنا عليك رديت ساعتها وقلتلك
يا بنتي عن حالي متسأليش
وان مجتش في منامك متزعليش
اصلي عايش وسطكم ومتعرفيش
عايش جوه قلب امك
عايش في صوت ضحك ابنك
عايش في نور عنيكم وبين ايديكم
متعيطيش .. متعيطيييش
وقولي لامك
يوم ما كان الهم همي
يوم ما كان في شئ بيدي
كنت شايل الحمل عنك
وكنت شايل بردو همك
يوم ما ييجي الدور عليه
يوم ما ترتاح فيه ايديه
وتغمض ايديكم عنيه
وعن عنيكم اختفي
يبقه كل الهم همك
يبقه جوه نبض قلبك
نبض قلبي
ساعتها .. كملي ومتعيطيش
انت قادره تكملي ومتزعليش
لمي كل الحب عندك
خلي كل الود جنبك
مدي جناحاتك حنان
عمري بيتك امان
ومتعيطيش
انت قادره تكملي .. ومتزعليش
اصلي عايش وسطكم ..
ومتعرفيش
هتقوليلي هات اماره
انك عايش وسطنا زي الملاك
هقولك فاكره يوم عيد ميلادك
يوم ما كنت قاعده فاكراني بالدعا
وانا كنت قاعد من وراكي اقول امين
والدمع من عينك نزل
وكلكم يومها متجمعين
وافتكرتوا ضحكتي على موقف عدى من سنين
وضحكتوا والدمع في عنيكم انين
هي دي اكبر اماره اني عايش وسطكم ومتعرفيش
وعايز اقولك
لو في يوم اشتاقتوا ليه
اسألوا عني الاماكن
هيكون هناك قلبي ساكن
روحوا العريش واسكندريه
زوروا المقطم واسماعيليه
روحوا كمان .. ومتوقفوش
في كل مكان هكون معاكم
ذكرى باقيه من زمان
ضحكة عالية في السما
مستنياكم
اصلي عايش وسطكم .. ومتعرفوش
تعليقات
إرسال تعليق